التخطي إلى المحتوى الرئيسي

تجربتي مع ميتسوبيشي أتراج

 

تجربتي مع ميتسوبيشي أتراج
سلبيات وعيويب ميتسوبيشي اتراج بعد 60 الف كيلو.


احتجت سيارة اقتصادية استعمالها داخل البلد للسواق ومشاوير الاهل استعمال مدينة.

المهم توفر بنزين و قيمتها في متناول اليد والمكيف بارد.

 احترت للامانة بين الصني والاكسنت والاتراج وفي النهاية اخذتها بسبب شي واحد وهو السعر، لقيتها بـ 36 الف شامة الضريبة والنقل والتأمين بعد المكاسرة من المعارض.

وبعطيكم تجربتي معا بعد ممشى 60 الف كلم وسنة استعمال بلد وسفريتين للطايف والمدينة المنورة


المواصفات :

- محرك 1.2 بتر v4 بقوه 82 حصان وعزم 100 نيوت فقط!!!!!

- قير cvt

- طيس بمقاس 14

- شاشة معلومات " بدون خرايط"

- اشارات بالمرايا

- ايرباقين فقط

- مدخلين aux ومدخل usb ومدخل cd

تقريبا هذي اغلب المواصفات الي فيها ، نوعا ما شحيحة لكن على سعرها الحمدالله ، اهم شي سيارة تمشي الحال


العزم: 1/10

عزم ما يسوى ريال يارجل لو تعديت الـ 90 السيارة تبدأ تحن وتكتم وصوت المكينة يرتفع تحسها بحضنك، عزمها ابدا ما يجمل وثقيل حتى بالتجاوز

العزل: عزلها نفس الشي اساسا سيارة بذا السعر لا تدور بها عزل

الرساوة : 5/10

الرساوة بعد ماهيب ذاك الزود لكن بسرعات بسيطة من 90-110 اشوفها ثابته على حجمها

الجودة : 7/10

كجودة قطع ومكينة وقير جدا ممتازة رغم الكرف ذا كله ما اشتكت من اي شي، ماغيرنا لها الا زيت و أقمشة فقط ، لكن جودة المواد الداخلية جدا سيئة، يارجل كل شي بلاستيك والله حتى المسامير ملاحظها خفيفة وشبك المكيف حاولت اعدله انكسر بيدي!!!! تحس انك راكب كرتون موب موتر


الوسع والمساحة الداخلية : 7/10

السيارة لاهي وسيعة ولا هي ضيقة، الصدق شفتها من برا وتوقعتها اضيق لكن لما دخلت اكشتفت انها اوسع لكن تبقى ضيقة ولا تنفع للطوال خصوصا فوق الـ 180سم ، جلست مرة ورا وكانت ضيييقة اعوذ بالله بشكل مايوصف مع ان الي قدامي مقدم الكرسي بس باقي احس رجلي محشورة وراسي قريب السقف بينه اقل من اصبعين!( اتكلم عن نفسي لاني طويل)


- الاقتصادية

اسطورة السيارات الاقتصادية السيارة توفيرها رهيييب الفل يكمل معاي اسبوع لـ 10 ايام -شرط القيادة هادية - لكن تمنيت التانكي يكون اكبر شوي لانه 42 لتر بس، الفل شفته في العداد يمشيني تقريبا 800 كيلو او اقل شوي وأخر قراءة شفتها كانت 18.9 لتر لكل 100 كيلو يعني شي جدرا طيب وممتاز


قطع الغيار وخدمات مابعد البيع : 6/10

الصدق ما رحت ابدا للوكيل ولا احتجته الحمدالله من ناحية الصيانة او المشاكل، فقط اروح عشان اخذ قطع لاني مالقيت موزع معتمد -او بالاصح ما دورت- اظن اسعارهم متقاربة مع الوكالة

وقطعها نوعا ما مرتفعة اجل مساعد الواحد بـ725 ! 

سيارتي الكرايسلر قيمة المساعد الواحد ب 390! 

عموما الاقمشة امامي وخلفي بـ400 او اقل شوي وفلتر البنزين450، اشوف اسعارها شاطحة مقارنة بالاكسنت و اليارس والصني


السيارة في الخطوط : 2/10

ماتنفع للخطوط ولا بريال طلعت بها للمدينة ماقدرت امشي اكثر من 100 في الطريق تحس السيارة خفيييفة وحتى باللفات بعض اللفات اهدي لـ 80-70 والراحة تسمع بها ولا تشوفها ظهرك ينكسر غير عزل الهوا الي يفقع راسك

طلعت بها للطايف بعد ونفس الشي ما تنفع عزمها ابدا ما يجمل، طلعت ومعي 4 اشخاص ورضيع يعين المجمل 5 في السيارة والسيارة شوي وانزل ادفها ماصدقنا ارقى عقبة الهدا الا وقد القير رفع حرارته ! 

بيني وبينكم هي ماهي حق عقبات وتحمبل ف عذرتها


الايجابيات

- توفير البنزين بطل وفوق الممتاز

- جودة السيارة جيدا جدا والمكيف بااارد

- السيارة خفيفة وواقتها سهلة تنفع للزحمة وكذا

- ماتتعبك بالمواقف ابدا

-سعرها مغري

- السيارة فيها فتحات تخزين كثير يمديك تخبي لبان وعلك وانصاص ف اي مكان


السلبيات

- قطع غيارها نار

- عزم السيارة ميت اكثر من اللازم يارجل لو انها عربية بحمار اهون من ذي وقير الـcvt كمل الناقص

- السيارة تخوف في الخطوط

- فيه حرارة عند رجول الراكب الي خلف السواق ما ادري ليه

- مواصفات الامان لك عليها

- جودة الخامات ماش كل شي حولك بلاستيك واكثر من مرة ينفك مسمار وتنخلع يد الدرج

- الاقمشة تخلص بسرعة مدري هو البلا من سواقة السواق ولا هي كذا


تجربة: zero0 من البوابة الرقمية.

شارك الموضوع عبر:

واتساب تويتر تيليجرام

تعليقات